हेटौँडामा विद्युतीय सवारीसाधन (इभी) को प्रयोग तीव्र गतिमा बढ्दै जाँदा चार्जिङ स्टेसनको आवश्यकता पनि बढ्न थालेको छ। निजी तथा सार्वजनिक दुवै क्षेत्रका इभी प्रयोगकर्ताले हाल उपलब्ध चार्जिङ पूर्वाधार पर्याप्त नभएको भन्दै थप स्टेसन स्थापना गर्नुपर्ने आवश्यकता औँल्याएका छन्।
पछिल्ला वर्षहरूमा हेटौँडा हुँदै काठमाडौँ, चितवन, वीरगञ्ज, जनकपुरलगायत विभिन्न गन्तव्यमा विद्युतीय सवारीको सञ्चालन उल्लेख्य रूपमा विस्तार भएको छ। निजी कारदेखि सार्वजनिक बससम्म इभीमा रूपान्तरण हुने क्रम बढेसँगै चार्जिङ सेवामाथिको निर्भरता पनि बढेको सरोकारवालाहरू बताउँछन्।
हेटौँडा–काठमाडौँ तथा हेटौँडा–नारायणगढ सडकखण्डमा नियमित इभी सञ्चालन गर्ने चालकहरूका अनुसार चार्जिङका लागि लामो समयसम्म पालो कुर्नुपर्ने अवस्था देखिन थालेको छ। यात्रुको चाप बढी हुने समय र लामो दूरीका सवारी सञ्चालन हुँदा चार्जिङ केन्द्रमा भीड झन् बढ्ने गरेको चालक श्याम सापकोटाले बताए।
इभी प्रयोगकर्ता तथा व्यवसायीहरूका अनुसार हाल सञ्चालनमा रहेका चार्जिङ केन्द्रहरूले बढ्दो माग धान्न कठिन हुन थालेको छ। उनीहरूले राजमार्ग तथा सहरी क्षेत्रका उपयुक्त स्थानमा थप उच्च क्षमताका चार्जिङ स्टेसन स्थापना गर्नुपर्ने माग गरेका छन्।
अटोमोबाइल व्यवसायीहरूका अनुसार इन्धन खर्च कम हुने र वातावरणमैत्री प्रविधिप्रति आकर्षण बढ्दै जाँदा विद्युतीय सवारीको बिक्री निरन्तर बढिरहेको छ। हेटौँडा र आसपासका क्षेत्रमा हरेक वर्ष सयौँ नयाँ इभी थपिने क्रम जारी रहेकाले चार्जिङ पूर्वाधार विस्तार अपरिहार्य बन्दै गएको उनीहरूको भनाइ छ।
हाल नेपाल विद्युत् प्राधिकरण तथा निजी क्षेत्रबाट विभिन्न स्थानमा चार्जिङ सेवा सञ्चालन भइरहे पनि भविष्यमा इभीको सङ्ख्या अझ बढ्ने अनुमान गरिएको छ। त्यसैले समयमै पूर्वाधार विस्तार नगरे सेवाग्राहीले थप समस्या भोग्नुपर्ने सरोकारवालाहरूको चेतावनी छ।
मकवानपुर हुँदै दैनिक ठूलो सङ्ख्यामा सवारीसाधन आवतजावत गर्ने भएकाले हेटौँडालाई विद्युतीय सवारीको महत्वपूर्ण ट्रान्जिट हबका रूपमा विकास गर्न सकिने सम्भावना रहेको विज्ञहरू बताउँछन्। त्यसका लागि पर्याप्त विद्युत् आपूर्ति, चार्जिङ स्टेसन विस्तार तथा सेवा व्यवस्थापनमा विशेष ध्यान दिनुपर्ने सुझाव दिइएको छ।
वातावरण संरक्षण र इन्धन आयात घटाउन विद्युतीय सवारीको प्रयोग प्रभावकारी मानिए पनि त्यसअनुसार आवश्यक पूर्वाधार निर्माण हुन नसके प्रयोगकर्ताले कठिनाइ भोग्नुपर्ने देखिएको छ। त्यसैले सम्बन्धित निकायले समयमै चार्जिङ पूर्वाधार विस्तारमा पहल गर्नुपर्ने आवश्यकता महसुस गरिएको छ।
