स्वस्थ जीवनशैली अपनाउन नियमित व्यायामसँगै सन्तुलित र विविध आहार पनि उत्तिकै आवश्यक हुन्छ। पोषक तत्वले भरिपूर्ण केही खानेकुरा दैनिक भोजनमा समावेश गर्न सके दीर्घकालीन रोगको जोखिम कम गर्न र समग्र स्वास्थ्य सुधार गर्न मद्दत पुग्ने विज्ञहरू बताउँछन्।
भान्सामा सजिलै पाइने वा बजारमा उपलब्ध केही खाद्य पदार्थमा शरीरका लागि उपयोगी ‘बायोएक्टिभ कम्पाउन्ड’ पाइन्छ। यस्ता प्राकृतिक तत्वले मुटु, कलेजो, पाचन प्रणाली, हड्डी तथा छालाको स्वास्थ्यलाई सहयोग पुर्याउनुका साथै मधुमेह, उच्च रक्तचाप र सुन्निने समस्याको जोखिम कम गर्न भूमिका खेल्न सक्छन्।
ब्रोकाउलीमा रहेको सल्फोराफेनले कलेजोको कार्यक्षमता सुधार गर्न सहयोग गर्छ भने आलसको दानाले विशेषगरी मेनोपजका लक्षण कम गर्न मद्दत गर्न सक्छ। करेलामा पाइने प्राकृतिक तत्वले रगतमा चिनीको मात्रा नियन्त्रण गर्न सहयोग पुर्याउँदा चुकन्दरले रक्तसञ्चार सुधार गरी उच्च रक्तचाप नियन्त्रणमा सहयोग गर्न सक्छ।
लट्टेको सागमा पाइने आइरन, कपर र फोलेट कपालको स्वास्थ्यका लागि उपयोगी मानिन्छ। मेथीको दानाले मधुमेह र तौल व्यवस्थापनमा सहयोग पुर्याउन सक्छ भने सुकाएको आलुबखडाले हड्डी बलियो बनाउन आवश्यक पोषक तत्व उपलब्ध गराउँछ।
जौमा रहेको बिटा–ग्लुक्यानले कोलेस्ट्रोल कम गर्न मद्दत गर्ने विश्वास गरिन्छ। त्यसैगरी, चेरीले युरिक एसिड र जोर्नीको सूजन कम गर्न सहयोग पुर्याउन सक्छ। अदुवाले पाचन प्रणालीलाई सहज बनाउनुका साथै शरीरको सूजन कम गर्न मद्दत गर्छ।
भिटामिन ‘सी’को राम्रो स्रोत अमलाले रोग प्रतिरोधात्मक क्षमता र छालाको स्वास्थ्यलाई सहयोग पुर्याउँछ। जायफलले राम्रो निद्रामा सहयोग गर्न सक्छ भने केसरले तनाव र चिन्ता कम गर्न सकारात्मक भूमिका खेल्न सक्ने विभिन्न अध्ययनले देखाएका छन्।
यद्यपि, यी खानेकुरा कुनै रोगको औषधिको विकल्प भने होइनन्। सन्तुलित आहार, नियमित शारीरिक गतिविधि र चिकित्सकको सल्लाहअनुसार उपचारलाई निरन्तरता दिनु नै स्वस्थ जीवनको आधार हो।एजेन्सी
