बागमती प्रदेशको राजनीति फेरि एकपटक तातिएको छ। सरकारको नेतृत्व कसले गर्ने भन्ने विषयले सत्ता साझेदार दलहरूबीच नयाँ खालको रस्साकस्सी सुरु भएको छ।
हाल इन्द्रबहादुर बानियाँ नेतृत्वको सरकारप्रति असन्तुष्टि जनाउँदै नेपाल कम्युनिस्ट पार्टी (एमाले) ले अब नेतृत्व आफूले पाउनुपर्ने दाबी अघि सारेको छ। एमालेले विगतमा भएको आलोपालो नेतृत्वको सहमति कार्यान्वयन गर्नुपर्ने भन्दै दबाब बढाएको हो।
यो सहमति तत्कालीन मुख्यमन्त्री बहादुर सिंह लामा र एमाले नेता जगन्नाथ थपलिया बीच भएको बताइन्छ, जसअनुसार दुई दलले आधा–आधा कार्यकाल सरकार चलाउने समझदारी गरेका थिए। एमालेको दाबी अनुसार अब त्यो समय नजिकिँदैछ।
तर, कथा यत्तिमै सीमित छैन।
एमालेभित्रै नेतृत्व परिवर्तनको विषयमा मत विभाजित देखिएको छ। एक पक्षले सहमति तत्काल लागू गर्नुपर्ने अडान राख्दा अर्का नेता केशव प्रसाद पोखरेल जस्ता नेताहरू भने अहिले सरकार परिवर्तन उपयुक्त नभएको तर्क गर्छन्। उनी बजेट नआउँदासम्म सरकार फेरबदल नहुने संकेत गर्छन्।
यता नेपाली कांग्रेस भने अर्को रणनीतिमा देखिन्छ। उसले ‘सभामुख कार्ड’ प्रयोग गर्दै शक्ति सन्तुलन मिलाउने प्रयास गरिरहेको छ। सरकार र संसद दुवैको नेतृत्वमा सन्तुलन हुनुपर्ने भन्दै कांग्रेसले नेतृत्व हस्तान्तरणको दबाबलाई केही मत्थर पार्ने संकेत दिएको छ।
कांग्रेसका नेता प्रभात तामाङ ले सरकार परिवर्तनबारे औपचारिक छलफल नभएको दाबी गर्छन्, जबकि एमाले नेताहरू भने आन्तरिक रूपमा छलफल तीव्र भएको बताउँछन्।
यसबीच, बारम्बार सरकार परिवर्तन हुने प्रवृत्तिले जनतामा निराशा बढ्न सक्ने चेतावनी पनि कांग्रेसकै नेता रामकृष्ण चित्रकार ले दिएका छन्।रासस
