हेटौंडा उपमहानगरपालिकामा विद्यार्थी संगठनहरूले शैक्षिक सुधारका लागि सक्रिय कदम चालिरहेका छन्। संयुक्त विद्यार्थी संगठनले आइतबार उपमहानगरपालिका कार्यालय पुगेर उपप्रमुख राजेश बानियाँलाई मागपत्र बुझाएका छन्।
संगठनका प्रतिनिधिहरूले कक्षा १–१२ का विद्यालयहरूले शिक्षा ऐन २०७४ र प्रचलित शैक्षिक नियमहरूको पालना नगरेको भन्दै गम्भीर ध्यानाकर्षण गराएका छन्।
मागपत्रमा मुख्य रूपमा उठाइएका विषयहरूमा शिक्षक योग्यता, छात्रवृत्ति व्यवस्थापन, विद्यार्थी सहुलियत र शुल्क प्रणाली समावेश छन्। संगठनले आवश्यक योग्यता नपुगेका शिक्षकहरूलाई हटाएर उचित कारबाही गर्न, १० प्रतिशत छात्रवृत्ति उपमहानगरपालिकाले अनिवार्य रूपमा सुनिश्चित गर्न, र विद्यार्थीका सहुलियत र छुटहरू तत्काल लागू गर्न आग्रह गरेको छ।
साथै, निजी तथा सामुदायिक विद्यालयहरूले अस्वाभाविक रूपमा उठाउने शुल्क खारेज गरी स्पष्ट मापदण्ड तय गरी कार्यान्वयन गर्न समेत संगठनले माग गरेको छ। माग सम्बोधन नभए आन्दोलनका कार्यक्रम चरणबद्ध रूपमा अघि बढाउने चेतावनी पनि दिइएको छ।
मागपत्रमा नेपाल विद्यार्थी संघका सागर घिमिरे, अखिल क्रान्तिकारीका छोईसाङ्ग स्याङ्तान र अनेरास्ववियुका नवराज पौडेल लगायतका विद्यार्थी नेताहरूले हस्ताक्षर गरेका छन्।
