राष्ट्रिय स्वतन्त्र पार्टीबाट चितवन क्षेत्र नम्बर ३ की उम्मेदवार सोविता गौतमले फागुन २१ गते हुने निर्वाचनलाई पुरानो राजनीतिक संस्कारको अन्त्य र नयाँ युगको सुरुवात गर्ने ऐतिहासिक अवसरको रूपमा चित्रण गरेकी छन्।
चितवनमा शुक्रबार आयोजित ‘हामी आयौं परिवर्तन उद्घोष सभा’लाई सम्बोधन गर्दै उनले भ्रष्टाचार मौलाइरहँदा सुशासन सम्भव नहुने स्पष्ट पारिन्। उनका अनुसार सुशासन स्थापना गर्न भ्रष्ट अभ्यासमा संलग्न राजनीतिज्ञहरूलाई राजनीतिक रूपमा विस्थापित गर्नैपर्छ।
“फागुन २१ को निर्वाचन केवल प्रतिनिधि छान्ने प्रक्रिया होइन, यो भ्रष्टाचारले जकडिएको अवस्थाबाट सुशासनतर्फ अघि बढ्ने मोड हो,” उनले भनिन्। उज्यालो र अँध्यारो सँगै रहन नसक्ने उदाहरण दिँदै उनले भ्रष्टाचार जारी रहेसम्म पारदर्शी शासन व्यवस्था स्थापित हुन नसक्ने धारणा राखिन्।
गौतमले निर्वाचनलाई लोकतन्त्रको सुन्दर अभ्यासको रूपमा व्याख्या गर्दै मतदाताको निर्णयले देशको दिशा निर्धारण गर्ने बताइन्। सही नेतृत्व चयन भए मुलुकले स्पष्ट मार्ग पाउने, अन्यथा गलत निर्णयले देशलाई झन् कठिन परिस्थितितर्फ धकेल्ने उनको चेतावनी थियो।
उनले विगतका निर्वाचन परिणामले जनताको अपेक्षा पूरा गर्न नसकेको संकेत गर्दै यसपटक मतदाताले सजग र जिम्मेवार निर्णय लिनुपर्नेमा जोड दिइन्।
