हेटौँडा । हेटौँडा उपमहानगरपालिका–१९ बस्तीपुरस्थित निर्मल माध्यमिक विद्यालयले कक्षा ११ को वार्षिक परीक्षाको नतिजा सार्वजनिक गरेको छ । विद्यालयले वैशाख १७ गतेदेखि २४ गतेसम्म सञ्चालन गरेको परीक्षाको नतिजा बुधबार सार्वजनिक गरेको हो ।
विद्यालयका प्रधानाध्यापक प्रवोध बिडारीका अनुसार परीक्षामा सहभागी १४२ जना विद्यार्थীমध्ये १२३ जना ग्रेडेड भएका छन् । विद्यालयमा शिक्षा, कम्प्युटर साइन्स, व्यवस्थापन, मानविकी तथा कानुन संकायमा पठनपाठन हुँदै आएको छ ।
प्रधानाध्यापक बिडारीले कक्षा १२ को पठनपाठन जेठ १ गते शुक्रबारदेखि सञ्चालन हुने जानकारी दिनुभयो ।
यसैबीच, विद्यालयबाट सहभागी विद्यार्थीहरूको एसईई नतिजामा पनि अघिल्लो वर्षको तुलनामा सुधार आएको जनाइएको छ । नियमिततर्फ ८५ जना विद्यार्थी सहभागी भएकोमा ३१ जना ग्रेडेड भएका छन् भने ग्रेड वृद्धितर्फ २७ जना विद्यार्थी ग्रेडेड भएका छन् ।
विद्यालयका अनुसार २०८१ सालमा ९२ जना विद्यार्थी एसईई परीक्षामा सहभागी भएकोमा २५ जना मात्रै ग्रेडेड भएका थिए । आगामी दिनमा नतिजा थप सुधार गर्न विद्यालयले विशेष सुधार योजना बनाएर अघि बढ्ने प्रधानाध्यापक बिडारीले बताउनुभयो ।
हाल विद्यालयमा कक्षा १० मा १०२ जना विद्यार्थी अध्ययनरत रहेका छन् । कक्षा १२ को वार्षिक परीक्षामा यस वर्ष ८२ जना विद्यार्थी सहभागी भएका छन् । गत वर्ष कक्षा १२ मा विद्यालयको ग्रेडेड प्रतिशत ५३ रहेको विद्यालयले जनाएको छ ।
१२ कक्षासम्म अध्ययन हुने उक्त विद्यालयमा हाल करिब १ हजार ३ सय विद्यार्थी अध्ययनरत रहेका छन्।
