आकर्षक तलब र सहज रोजगारीको प्रलोभन देखाएर नेपाली युवालाई दक्षिण–पूर्वी एशियाका देशहरूमा पुर्याई अनलाइन ठगीमा लगाउने घटना भयावह रूपमा बढ्दै गएको छ। नेपालको परराष्ट्र मन्त्रालयका अनुसार थाइल्याण्ड, म्यानमार, लाओस र कम्बोडियामा सञ्चालित स्क्यामिङ केन्द्रहरूबाट हालसम्म ३९२ जनाको उद्धार गरी नेपाल फर्काइएको छ।
मन्त्रालयका सहसचिव प्रकाश अधिकारीले अझै ३०९ जना उद्धार प्रक्रियामा रहेको जानकारी दिएका छन्। तीमध्ये कम्बोडियामा मात्रै २४८ जना पर्खाइमा छन्।
संयुक्त अरब इमिरेट्स र मलेसियामा लामो समयदेखि कार्यरत कम्प्युटर ज्ञान भएका नेपालीहरू यस्ता गिरोहको मुख्य निशानामा पर्ने गरेका छन्। उनीहरूलाई अनलाइन बेटिङ, क्यासिनो, गेमिङ र क्रिप्टो ठगी जस्ता गैरकानूनी गतिविधिमा संलग्न गराइने गरेको पाइएको छ।
उजुरीअनुसार तोकिएको लक्ष्य पूरा गर्न नसके शारीरिक तथा मानसिक यातना दिने, राहदानी खोसेर बन्धक बनाउने र अर्को व्यक्ति नल्याएसम्म नछोड्ने जस्ता अमानवीय व्यवहार हुने गरेको छ। गैरकानूनी रूपमा म्यानमार प्रवेश गरेका १८ जना नेपालीलाई त्यहाँको अदालतले एक वर्षको जेल सजाय सुनाइसकेको छ।
मन्त्रालयका प्रवक्ता लोकबहादुर क्षेत्रीका अनुसार सन् २०२२ यता उद्धारको संख्या बर्सेनि बढिरहेको छ। तर अझै कति नेपाली यी देशहरूमा फसेका छन् भन्ने यकिन तथ्यांक सरकारसँग छैन।
अधिकांश पीडित आफ्नै चिनजानका व्यक्तिको विश्वासमा परी स्क्यामिङ केन्द्रसम्म पुग्ने गरेको पाइएको छ। सरकारले विदेश रोजगारीको नाममा आउने आकर्षक प्रस्तावप्रति विशेष सतर्कता अपनाउन युवाहरूलाई आग्रह गरेको छ।
