हेटौंडाको टिसीएन चौरमा जारी कृषि तथा पर्यटन महोत्सव अन्तर्गत भएको राष्ट्रिय महिला भलिबल प्रतियोगितामा काठमाडौंको चन्द्रगिरी नगरपालिका स्थित न्यू डायमण्ड क्लबले शानदार जित दर्ता गर्दै उपाधि उचालेको छ।
आइतबार सम्पन्न फाइनल खेलमा न्यू डायमण्डले बागमती प्रदेशको केशवलाल श्रेष्ठ स्मृति प्रतिष्ठानलाई सोझो तीन सेटमा पराजित गर्दै आफ्नो उत्कृष्ट प्रदर्शन कायम राख्यो। खेलमा न्यू डायमण्डले २५–१३, २५–१५ र २५–२३ को सेटमा सहज जित निकाल्यो।
गत संस्करणमा उपविजेतामा सीमित भएको न्यू डायमण्डले यसपटक भने कुनै कमजोरी नदेखाई उपाधि कब्जा गरेको हो। प्रतियोगितामा समूह चरणदेखि नै बलियो देखिएको टोलीले फाइनलसम्म उत्कृष्ट लय कायम राख्यो।
प्रतियोगितामा ६ राष्ट्रिय टोली सहभागी थिए। न्यू डायमण्ड र केशवलाल प्रतिष्ठान समूह चरण पार गर्दै फाइनल पुगेका थिए। सेमीफाइनलमा न्यू डायमण्डले मधेश प्रदेशको जनशक्ति युवा क्लबलाई हराएको थियो भने केशवलाल प्रतिष्ठानले पाल्पाको स्टेप भलिबल क्लबलाई पराजित गर्दै उपाधि भिडन्त तय गरेका थिए।
उपाधिसँगै न्यू डायमण्डले ३ लाख रुपैयाँ, शिल्ड, मेडल र प्रमाणपत्र प्राप्त गर्यो भने उपविजेता केशवलाल प्रतिष्ठानले २ लाख रुपैयाँमा चित्त बुझायो। सेमीफाइनलमा पराजित टोलीहरूले पनि ५० हजार रुपैयाँसहित सम्मान पाए।
व्यक्तिगततर्फ न्यू डायमण्डकी सुनिता क्षेत्री प्रतियोगिताकी सर्वोत्कृष्ट खेलाडी घोषित भइन्। अन्य विधामा पनि विभिन्न खेलाडीहरूले उत्कृष्ट प्रदर्शनका आधारमा पुरस्कार हात पारे।
कार्यक्रममा बागमती प्रदेशका कृषि तथा पशुपन्छी विकास मन्त्री मदुसुदन पौडेलको प्रमुख आतिथ्यमा विजेताहरूलाई पुरस्कार वितरण गरिएको थियो।
अब महोत्सव अन्तर्गत राष्ट्रिय खुला तेक्वान्दो प्रतियोगिता बुधबारदेखि सुरु हुने आयोजकले जनाएको छ।
