नेपाली फिल्म क्षेत्रमा प्रतिक्षित मानिएको बाटुलो जून को प्रदर्शन मिति औपचारिक रूपमा सार्वजनिक गरिएको छ। अनमोल केसी को जन्मदिनको अवसर पारेर निर्माताले फिल्मको रिलिज मिति घोषणा गरेका हुन्।
सनराइज पिक्चर्स प्रालिको ब्यानरमा बनेको यो फिल्म आगामी वर्ष २०८३ सालको दशैं, फूलपातीको अवसर (असोज ३० / अक्टोबर १६) मा प्रदर्शनमा आउनेछ। पोस्टरसहित सार्वजनिक गरिएको घोषणाले दर्शकमाझ उत्सुकता थपेको छ।
सार्वजनिक पोस्टरमा अनमोल केसी र प्रिन्सी खतिवडा लाई प्रमुख रूपमा प्रस्तुत गरिएको छ। जन्मदिनको अवसरमा अनमोलले “दशैंमा भेटौंला” भन्दै आफ्ना प्रशंसकलाई विशेष सन्देश दिएका छन्।
ग्रामिण परिवेशमा आधारित प्रेमकथामा निर्माण गरिएको फिल्मलाई जिया केसी र भविष्य खड्का ले निर्माण गरेका हुन्। निर्माताका अनुसार फिल्मले दर्शकलाई करिब ३० वर्षअघिको नेपाली समाजमा लैजानेछ, जहाँ विगत र वर्तमान दुवैको अनुभूति हुनेछ।
फिल्मका निर्देशक भुवन केसी स्वयं शीर्ष भूमिकामा पनि देखिनेछन्। साथै, न्यान्सी खड्का, प्रकाश घिमिरे, रियर राई, दीपक केसी, श्वेता मिश्र लगायत कलाकारहरूको अभिनय रहनेछ।
फिल्मको छायांकन काठमाडौं, म्याग्दी, नुवाकोट, चित्लाङ र पोखरा जस्ता विभिन्न स्थानमा गरिएको छ। अहिले करिब १० प्रतिशत छायांकन बाँकी रहेको र नयाँ वर्ष २०८३ को आसपास पोखरामा अन्तिम छायांकन गरिने योजना छ।
समग्रमा, पारिवारिक र भावनात्मक कथा बोकेको ‘बाटुलो जून’ दशैंमा नेपाली दर्शकका लागि विशेष आकर्षण बन्ने अपेक्षा गरिएको छ।
