फ्राइडे रिलिज अन्तर्गत आज माघ १६ गते शुक्रवारदेखि दुई नयाँ नेपाली फिल्महरु ‘आ बाट आमा’ तथा ‘द ब्ल्यू लाइट’ को सावर्जनिक प्रदर्शन प्रारम्भ भएको छ । लामो समयदेखि प्रचार–प्रसारमा व्यस्त यी दुबै फिल्महरुलाई क्यूएफएक्स लगायत देशका अधिकांश सिनेमाहरुले राम्रो शो उपलब्ध गराएका छन् ।
‘आ बाट आमा’ ले केन्दीय चलचित्र जाँच पास समिति ९सेन्सर बोर्ड० बाट युनिभर्सल सर्टिफिकेट पाएको छ । त्यसैले यो फिल्म सबै उमेरका दर्शकले हेर्न पाउने छन् । फिल्मका निर्देशक चन्द्र पन्तले फिल्मको सेन्सर पास भएकोमा खुशी व्यक्त गर्दै यसले हरेक उमेरका दर्शकलाई मनोरञ्जन प्रदान गर्ने बताएका छन् । यो फिल्ममा विपना थापा, पल शाह, प्रदीप रावत, साइग्रेस पोखरेल, उषा उप्रेती, सिमरन पन्त, गजित विष्ट, बेगम नेपाली आदि कलाकारहरुले अभिनय गरेका छन् । यो फिल्ममा समावेश गीत ‘लैजा खबर ए हावा’ दर्शकमाझ निकै लोकप्रिय रहेको छ ।
आर्या इन्टरटेन्मेन्टको प्रस्तुतिमा निर्माण भएको यस फिल्ममा निर्देशक पन्तकै कथा तथा पटकथा रहेको छ भने फिल्मका गीतमा कोशिस क्षेत्री, बाबुल गिरी र थानेश्वर गौतमको संगीत रहेको छ । गम्भीर विष्ट तथा दिलिप ओखेडाको कोरियोग्राफी रहेको फिल्म अभिमन्यू निरवीले लेखेका हुन् भने संवादमा अमर न्यौपाने, अभिमन्यू निरवी र चन्द्र पन्तले सहकार्य गरेका छन् ।
यो फिल्मलाई नवराज उप्रेतीले खिचेका हुन् । फिल्ममा कृष्ण प्रसाद सुवेदी, ओमकार पन्त, प्रकाशजंग कुँवर, ध्रुव प्रसाद न्यौपाने र क्षितिज ढुंगानाको लगानी रहेको छ । यस फिल्मका कार्यकारी निर्माता करण सिंह रसाली हुन् । फिल्मको सम्पादन मिलन श्रेष्ठको हो भने ट्रेलर र टीजर सम्पादनको काम साहिल खानले गरेका छन् । फिल्मको वितरण आरआर फिल्म्सले गर्दैछ भने डिजिटल अधिकार ओएसआर डिजिटलको रहेको छ ।
आज शुक्रवारदेखि नै प्रदर्शनमा आएको फिल्म ‘द ब्ल्यू लाइट’ मार्फत अभिनेत्री बेनिशा हमाल अभिनेत्रीबाट निर्मात्री बनेकी छिन् । शहिद दिवसको अवसर पारेर दर्शकमाझ आएको यो फिल्ममा केही अनुभवी कलाकारको अभिनय देख्न पाइने छ । यो फिल्ममा अभिनेत्री बेनिशा हमालसंगै अर्पण थापा, महेश त्रिपाठी, आयुष्मान देशराज जोशी, सृष्टि श्रेष्ठ, सुरक्षा इटानी, गृष्मा कटुवाल, सहारा शर्मा आदि कलाकारहरुले अभिनय गरेका छन् ।
यो फिल्मको टीजर, गीत, ट्रेलर आदि प्रचार सामग्रीले दर्शकमाझ राम्रो हाइप बनाइसकेकाले फिल्मका निर्देशक बलिराम चौहान यसको व्यवसायिक सफलताप्रति ढुक्क देखिन्छन् । चौहानको डेब्यू निर्देशनमा बनेको यो फिल्ममार्फत उनले नयाँ विषयवस्तुलाई दर्शकमाझ पस्किने जमर्को गरेका छन् । यसअघि विभिन्न फिल्ममा मुख्य सहायक निर्देशकको रुपमा काम गरिसकेका चौहानको पछिल्लो फिल्म ‘बलिदान’ गत दशैँमा प्रदर्शन भएको थियो ।
साइकोलोजिकल थ्रिलर जनरामा निर्माण भएको ‘द ब्ल्यू लाइट’ लाई स्काइफल पिक्चर्सले प्रस्तुत गरेको छ । फिल्ममा सस्पेन्स विषयवस्तु समावेश छ । गम्भीर तथा जटिल विषयवस्तुमा आधारित फिल्म रुचाउने दर्शकका लागि ‘द ब्ल्यू लाइट’ विशेष हुन सक्ने निर्माण पक्षको भनाइ रहँदै आएको छ ।
यो फिल्ममा अभिनेत्री बेनिशा हमालले फिल्ममा माया नाम गरेकी युवतीको भूमिका निर्वाह गरेकी छिन्, जो एक्लोपन तथा कुलतमा फसेकी देखिन्छिन् । फिल्ममा मायाको जीवनमा घटेका रहस्यमय घटनाहरू, प्रेम, धोका र बदलाको कथालाई चित्रण गरिएको छ ।
फिल्ममा अर्पण थापाको रहस्यमयी भूमिका तथा प्रहरी सोधपुछका दृश्यहरूले सस्पेन्सलाई थप उचाइ प्रदान गरेको छ । फिल्म भित्र विक्रम नाम गरेका पात्रको वरिपरि घुमेको रहस्य तथा ‘द ब्ल्यू लाइट’ को अर्थ के हो भन्ने कुराले दर्शकलाई सिनेमा हलसम्म आकर्षित गर्न सक्ने सम्भावना छ ।
निर्देशक चौहानले आफ्नो फिल्मको विषयवस्तु नयाँ नभए पनि यसको प्रस्तुतिकरणको शैली पृथक भएको दावी गरेका छन् । ‘हामीले देखाउन खोजेको विषयवस्तु नयाँ पक्कै पनि छैन । तर हामीले त्यही कुरालाई नयाँ शैलीमा देखाएका छौँ, निर्देशक चौहानको भनाइ छ– ‘फिल्म भित्र रहेका पात्रका संवेग र भावनाहरू उच्च संवेदनशील छन् जसले दर्शकलाई एक खालको अनुभव दिन्छ भने आशा गर्दछौँ ।’
‘द ब्ल्यू लाइट’ को सह–निर्मातामा भोलानाथ कटुवाल र रमन ग्रे रहेका छन् भने कार्यकारी निर्मातामा फिल्मका छायाँकारसमेत रहेका नरेन्द्र मैनाली तथा अभिनेत्री बेनिशा हमाल छन् ।
