मकवानपुर। पश्चिम मकवानपुरको मनहरी गाउँपालिका–५ मा रहेको श्री भोजसिद्द माध्यमिक विद्यालयले स्थापना भएको ५० वर्ष पूरा गरेको अवसरमा स्वर्ण जयन्ती समारोह आयोजना गर्ने भएको छ । विद्यालयले आगामी फागुन ७ गतेदेखि ९ गतेसम्म विविध शैक्षिक, खेलकुद तथा सांस्कृतिक कार्यक्रमसहित स्वर्ण जयन्ती मनाउन लागेको हो ।
स्वर्ण जयन्ती समारोहलाई भव्य र अर्थपूर्ण बनाउने उद्देश्यले मनहरी गाउँपालिका स्तरीय शिक्षक भलिबल प्रतियोगिता, छात्र भलिबल प्रतियोगिता, सांस्कृतिक कार्यक्रम तथा वक्तृत्वकला प्रतियोगिता आयोजना गरिनेछ । साथै खुला म्याराथन प्रतियोगिता, अभिभावक घ्याम्पो फुटाइ प्रतियोगिता, रक्तदान तथा स्वास्थ्य शिविर कार्यक्रमसमेत समावेश गरिएको मनहरी गाउँपालिका–५ का वडा अध्यक्ष दीपेन्द्र अधिकारीले जानकारी दिए ।
स्वर्ण जयन्तीको अवसरमा विद्यालय परिसरमा स्वर्ण स्तम्भ निर्माण गरिनुका साथै विद्यालयको इतिहास, उपलब्धि र योगदान समेटिएको स्मारिका प्रकाशन गर्ने तयारी पनि गरिएको छ ।
स्वर्ण जयन्ती समारोहका प्रचार–प्रसार उपसमितिका संयोजक उमेश अधिकारीले विद्यालयको शैक्षिक यात्रामा योगदान पुर्याउने सबै शिक्षक, विद्यार्थी, अभिभावक, पूर्व विद्यार्थी तथा स्थानीय समुदायलाई समारोहमा सक्रिय सहभागिताका लागि आग्रह गरेका छन् ।
विद्यालय व्यवस्थापन समितिका अध्यक्ष रामप्रसाद कालाखेतीले विद्यालयले आधा शताब्दी लामो शैक्षिक यात्रालाई स्मरण गर्दै आगामी दिनमा गुणस्तरीय शिक्षा र समग्र शैक्षिक विकासमा अझ प्रभावकारी भूमिका निर्वाह गर्ने विश्वास व्यक्त गरेका छन् ।
