चलचित्र ‘हरिबहादुरको जुत्ता’ पछि निर्माण टिमले नयाँ चलचित्र ‘श्रीनिवास’ निर्माणको औपचारिक घोषणा गरेको छ। गएको दशैँको फूलपातीमा रिलिज भएको ‘हरिबहादुरको जुत्ता’ ले दर्शकबाट सकारात्मक प्रतिक्रिया पाएको थियो र व्यावसायिक रूपमा पनि सफल रहेको थियो।
एसएम मोसन पिक्चर्सले आफ्नो ब्यानरमा दोस्रो चलचित्रका रूपमा ‘श्रीनिवास’ निर्माण गर्न लागेको हो। यस चलचित्रमा हरिवंश आचार्य र अभिषेक खड्का मुख्य भूमिकामा रहनेछन्। अभिषेक खड्काको डेब्यु चलचित्र ‘कुमारी’ यही माघ २३ गतेबाट रिलिज हुँदैछ, जसले उनलाई दर्शकमाझ चर्चामा ल्याएको छ।
चलचित्रलाई सरोज ओली र मोहितवंश आचार्य उत्पादन गर्नेछन् भने निर्देशन सजन काफ्ले र आकाश बरालले संयुक्त रूपमा गर्नेछन्। उनीहरूले यसअघि ‘बेहुली फ्रम मेघौली’ निर्माण गरिसकेका छन्।
लेखन अभिमन्यु निरावी ले गर्नेछन्। निर्माण टिमले चलचित्रका अन्य कलाकार र प्राविधिक पक्षबारे क्रमशः जानकारी सार्वजनिक गर्ने तयारी गरेको जनाएको छ।
‘श्रीनिवास’ ले नेपाली चलचित्र क्षेत्रमा नयाँ चर्चा ल्याउने अपेक्षा गरिएको छ।
