हेटौँडा । राष्ट्रिय स्वतन्त्र पार्टी मकवानपुरले जिल्लाभर संगठन सुदृढीकरण अभियानलाई तीव्र बनाउँदै पालिका अधिवेशनको कार्यतालिका सार्वजनिक गरेको छ । शनिबार हेटौँडामा बसेको जिल्ला कमिटी बैठकले जेठ महिनाभित्र १० वटै स्थानीय तहमा अधिवेशन सम्पन्न गर्ने निर्णय गरेको हो ।
बैठकले थाहा नगरपालिकाको अधिवेशन जेठ ९ गते गर्ने तय गरेको छ । उक्त अधिवेशनको संयोजन जिम्मेवारी राजकुमार कार्की र रमेश थापालाई दिइएको छ ।
त्यसैगरी, जेठ १० गते हेटौँडा उपमहानगरपालिका तथा मनहरी गाउँपालिकामा अधिवेशन आयोजना गरिने भएको छ । यी पालिकाका लागि विष्णु दाहाल, टाकाराज थापा, किशोर अर्याल र ईश्वर दाहाललाई जिम्मेवारी तोकिएको छ ।
इन्द्रसरोवर गाउँपालिकाको अधिवेशन जेठ १३ गते हुने तय भएको छ भने त्यसका लागि पनि राजकुमार कार्की र रमेश थापालाई खटाइएको छ ।
यस्तै, मकवानपुरगढी गाउँपालिकाको अधिवेशन जेठ १५ गतेका लागि निर्धारण गरिएको छ । उक्त पालिकामा विष्णु दाहाल र टाकाराज थापाले नेतृत्व सम्हाल्ने भएका छन् ।
रास्वपाले जेठ १६ गते बागमती, बकैया र राक्सिराङ गाउँपालिकामा एकैदिन अधिवेशन गर्ने तयारी गरेको छ । ती पालिकामा सुनिता राई, विवेक कट्टेल, अस्मिता न्यौपाने, विवेक सुवेदी र सन्तोष बर्तौलालाई जिम्मेवारी दिइएको जनाइएको छ ।
कार्यवाहक जिल्ला सभापति तथा मकवानपुर–१ का सांसद प्रकाश गौतमको अध्यक्षतामा सम्पन्न बैठकले जिल्ला अधिवेशनअघि सबै पालिकाको नेतृत्व चयन प्रक्रिया टुंग्याउने रणनीति बनाएको हो ।
रास्वपाका अनुसार मकवानपुरका १० स्थानीय तहमध्ये भीमफेदी गाउँपालिकामा भने अधिवेशन यसअघि नै सम्पन्न भइसकेको छ ।
