हेटौँडाको सहिद स्मारक परिसरमा निर्माण भइरहेको जनजाति संग्रहालय अब सञ्चालनको अन्तिम चरणमा पुगेको छ। स्मारक विकास समितिले आगामी असार महिनाको अन्तिम सातासम्म संग्रहालयलाई औपचारिक रूपमा खुला गर्ने योजना बनाएको जनाएको छ।
संग्रहालयलाई समृद्ध बनाउन विभिन्न आदिवासी जनजाति संगठनका प्रतिनिधिहरूसँग छलफल तथा अन्तरक्रिया कार्यक्रम आयोजना गरिएको थियो। उक्त कार्यक्रममा सहभागीहरूले सांस्कृतिक सामग्री संकलन, संरक्षण र व्यवस्थापनका विषयमा महत्वपूर्ण सुझावहरू दिएका छन्। समितिका सदस्य नवीन सिग्देलका अनुसार प्राप्त सुझावहरूले संग्रहालयलाई अझ प्रभावकारी बनाउने अपेक्षा गरिएको छ।
कार्यक्रममा बोल्दै समितिका अध्यक्ष तथा बागमती प्रदेशका प्रथम मुख्यमन्त्री डोरमणि पौडेलले संग्रहालयमा विभिन्न जनजातिहरूको भेषभूषा, भाषा, संस्कार, रहनसहन र परम्परागत जीवनशैली झल्किने सामग्री राखिने बताए। उनले संग्रहालयलाई केवल अवलोकनस्थल नभई अध्ययन तथा अनुसन्धान केन्द्रको रूपमा समेत विकास गरिने जानकारी दिए।
हाल चेपाङ, तामाङ, नेवार, थारू, माझी, मगर, गुरुङ, राई, लिम्बू, सुनुवार, बनकरिया र पहरी समुदायका सांस्कृतिक सामग्रीहरू संकलन भइरहेको छ। यसले विविध जातजातिको पहिचान संरक्षण र प्रवर्द्धनमा योगदान पुर्याउने विश्वास लिइएको छ।
संग्रहालय सञ्चालनका लागि आवश्यक सामग्री संकलन र समन्वयको जिम्मेवारीसहित रामकृष्ण थापाको संयोजकत्वमा एक समिति गठन गरिएको छ। समितिमा विभिन्न जनजातिका प्रतिनिधिहरू सहभागी रहेका छन्।
उक्त कार्यक्रममा स्मारक विकास समितिका पदाधिकारीहरू, नेपाल आदिवासी जनजाति महासंघ मकवानपुरका प्रतिनिधि तथा विभिन्न जातीय संगठनका अगुवाहरूको उपस्थिति रहेको थियो।
