मकवानपुर — भीमफेदी गाउँपालिका ले अनौपचारिक क्षेत्रका श्रमिक तथा सामुदायिक महिला स्वास्थ्य स्वयंसेविकालाई सामाजिक सुरक्षा प्रणालीमा समेट्ने अभियानलाई तीव्र बनाएको छ। गाउँपालिकाले चालु आर्थिक वर्ष २०८२/०८३ मा ३० लाख रुपैयाँ बजेट विनियोजन गर्दै ११६ जनालाई सामाजिक सुरक्षा कोष मा आवद्ध गराएको हो।
यस कार्यक्रमअन्तर्गत ४७ जना महिला स्वास्थ्य स्वयंसेविका र ७९ जना अनौपचारिक श्रमिक कोषमा जोडिएका छन्। बिहीबार आयोजित कार्यक्रममा इन्द्रबहादुर बानियाँ र जयराम थापा ले आवद्ध श्रमिकहरूलाई परिचयपत्र वितरण गरेका थिए।
गाउँपालिकाले हालसम्म कुल ३११ जना असंगठित क्षेत्रका श्रमिकलाई योगदानमा आधारित सामाजिक सुरक्षा योजनामा समेटिसकेको जनाएको छ। योजनाअन्तर्गत श्रमिकहरूले औषधि उपचार, मातृत्व सुरक्षा, दुर्घटना तथा अशक्तता सुरक्षा, आश्रित परिवार सुरक्षा र वृद्धावस्था भत्ता जस्ता सुविधा पाउनेछन्।
कोषमा आवद्ध भएपछि स्वास्थ्य उपचार खर्चमा उल्लेख्य कमी आएको श्रमिकहरूको अनुभव छ। पहिले करिब १० हजार रुपैयाँसम्म खर्च हुने उपचार अहिले करिब २ हजार रुपैयाँमै सम्भव भएको उनीहरू बताउँछन्।
गाउँपालिकाले श्रमिकहरूको न्यूनतम पारिश्रमिकको ११ प्रतिशत र आफ्नो तर्फबाट ९.३५ प्रतिशत गरी कुल २०.३५ प्रतिशत (मासिक २४७९ रुपैयाँ) रकम कोषमा जम्मा गर्ने व्यवस्था मिलाएको छ।
२०८० साउन ३० गते कोषसँग सम्झौता गर्दै कार्यक्रम सुरु गरेको गाउँपालिका अनौपचारिक श्रमिकलाई सामाजिक सुरक्षा योजनामा आवद्ध गराउने नेपालकै पहिलो स्थानीय तहका रूपमा परिचित भएको छ।
गाउँपालिका अध्यक्ष हिदम लामा को सभाध्यक्षतामा सम्पन्न कार्यक्रममा श्रम, रोजगार तथा यातायात मन्त्री, जिल्ला समन्वय समिति मकवानपुरका प्रमुख ललित घलान तथा नेपाल पत्रकार महासंघ मकवानपुरका अध्यक्ष बालकृष्ण अधिकारीलगायतको सहभागिता रहेको थियो।
