फागुन २१ गते हुने प्रतिनिधिसभा सदस्य निर्वाचनमा उम्मेदवारले चुनावी प्रचारका क्रममा दुईभन्दा बढी गाडी प्रयोग गर्न नपाउने भएका छन्। निर्वाचन आचारसंहिता, २०८२ अनुसार एक उम्मेदवारले निर्वाचन अधिकृतको अनुमति लिएर बढीमा दुईवटा सवारी साधन मात्र प्रयोग गर्न पाउने छन्। नियम उल्लंघन गरे कारबाही हुनेछ।

चुनावी प्रचारमा प्रयोग हुने सवारी साधन विदेशी नम्बर प्लेटका हुन नहुने पनि आचारसंहितामा उल्लेख छ। साथै, एउटा दल वा उम्मेदवारको नाममा अनुमति लिएको सवारी साधन अन्य दल वा उम्मेदवारले प्रयोग गर्न नपाउने व्यवस्था गरिएको छ। अनुमति प्राप्त सवारी साधन प्रयोग गरी मतदाता ओसारपसार गर्नसमेत निषेध गरिएको छ।