राष्ट्रिय स्वतन्त्र पार्टी (रास्वपा) ले आगामी स्थानीय तह निर्वाचनलाई लक्षित गर्दै उम्मेदवार छनोट प्रक्रिया औपचारिक रूपमा अगाडि बढाएको छ।
पार्टी केन्द्रीय कार्यालयद्वारा जारी सूचनाअनुसार वैशाख ७ गते बसेको केन्द्रीय समिति बैठकले उम्मेदवार छनोटलाई व्यवस्थित, निष्पक्ष र पारदर्शी बनाउन विशेष समिति गठन गर्ने निर्णय गरेको हो। उक्त समितिको संयोजकमा सह-महामन्त्री विपिनकुमार आचार्य रहेका छन् भने अन्य केन्द्रीय सदस्यहरूलाई पनि विभिन्न जिम्मेवारी दिइएको छ।
समितिमा सचिवसहित विभिन्न पदाधिकारीहरू समावेश गरिएको छ, जसले उम्मेदवार छनोटको सम्पूर्ण प्रक्रिया समन्वय गर्नेछन्।
पार्टीले वडा, पालिका, जिल्ला र प्रदेश तहबाट उम्मेदवारका लागि सिफारिस संकलन गर्ने कार्यतालिका समेत सार्वजनिक गरेको छ। प्राप्त सिफारिसहरूको अध्ययन तथा मूल्यांकनपछि अन्तिम उम्मेदवार टुंगो लगाइने जनाइएको छ।
रास्वपाले सबै तहका संगठनलाई तोकिएको समयभित्र सिफारिस र सुझाव पठाउन निर्देशन दिएको छ। साथै, आवश्यक जानकारीका लागि सम्बन्धित पदाधिकारीहरूसँग सम्पर्क गर्न सकिने व्यवस्था पनि गरिएको छ।
