बाराको परवानीपुर गाउँपालिका–१ रहरियामा बुधबार बिहान भएको आमा–छोराको नृशंस हत्या प्रकरणले नयाँ मोड लिएको छ। प्रारम्भिक रूपमा पारिवारिक विवाद जस्तो देखिएको यो घटना अब योजनाबद्ध र संगठित अपराधको संकेततर्फ अघि बढेको छ।
प्रहरी अनुसन्धानले २८ वर्षीय रामेश्वर मण्डल र उनकी ४६ वर्षीया आमा सुमित्रा देवी मण्डलको घाँटी रेटेर हत्या गरिएको पुष्टि गरेको छ। घटनामा मृतक रामेश्वरकी पत्नी मनिता देवी मण्डल र उनका प्रेमी धर्मेन्द्र महतो मुख्य योजनाकार रहेको प्रहरीको दाबी छ।
अनुसन्धानका अनुसार मनिता र धर्मेन्द्रबीच लामो समयदेखि प्रेम सम्बन्ध रहेको खुलेको छ। धर्मेन्द्र वैदेशिक रोजगारीका क्रममा दुबईमा रहे पनि माघ १२ गते काठमाडौँ फर्किएपछि हत्या योजनालाई मूर्त रूप दिइएको हुनसक्ने प्रहरीको आशंका छ।
बाराका प्रहरी उपरीक्षक नरेन्द्र कुँवरले घटनाको संवेदनशीलतालाई ध्यानमा राख्दै अनुसन्धान अझै जारी रहेको बताए। “सबै तथ्य सार्वजनिक गर्न समय लाग्छ, तर दोषी कोही पनि उम्किन पाउने छैन,” उनले भने।
‘सुपारी’ हत्या भएको आशंका बलियो
प्रहरीले यो हत्या केवल व्यक्तिगत रिसइबीको परिणाम नभई ‘सुपारी’ दिएर गराइएको हुनसक्ने सम्भावनालाई समेत गम्भीर रूपमा अध्ययन गरिरहेको छ। धारिलो हतियार प्रयोग, योजनाबद्ध आक्रमण र सम्भावित अन्य व्यक्तिको संलग्नताले संगठित अपराधको आशंका बढाएको छ।
मोबाइल कल डिटेल, सिसी क्यामेरा फुटेज र अभियुक्तका बयानका आधारमा थप व्यक्ति पक्राउ पर्ने सम्भावना रहेको प्रहरीले जनाएको छ।
एकै परिवारभित्र भएको यस्तो जघन्य घटनाले सिंगो परवानीपुर क्षेत्र शोक र त्रासमा डुबेको छ। स्थानीयवासीहरूले यो घटनालाई “अमानवीय र अकल्पनीय” भन्दै संलग्न सबैलाई कडा कानुनी कारबाही गर्न माग गरेका छन्।
प्रहरी अनुसन्धानले बिस्तारै घटनाको रहस्य खोल्दै जाँदा, यो हत्याकाण्ड घरेलु विवादभन्दा धेरै पर—प्रेम सम्बन्ध, षड्यन्त्र र सम्भावित सुपारी नेटवर्कसम्म फैलिएको देखिन थालेको छ।
