हर्कराज राई नेतृत्वको श्रम संस्कृति पार्टीले देशको समग्र रूपान्तरणका लागि ३३ बुँदे प्रतिबद्धता सार्वजनिक गरेको छ। मंगलबार राजधानीमा आयोजित पत्रकार सम्मेलनमा उनले नेपालको परराष्ट्र नीति, शिक्षा प्रणाली, श्रम र आर्थिक विकासका क्षेत्रमा गहिरो सुधार आवश्यक रहेको धारणा व्यक्त गरे।
उनका अनुसार नेपालले असंलग्न परराष्ट्र नीतिलाई कडाइका साथ पालना गर्दै राष्ट्रिय सार्वभौमिकतालाई पहिलो प्राथमिकतामा राख्नुपर्छ। Millennium Challenge Corporation (MCC) Nepal Compact र State Partnership Program (SPP) Nepal जस्ता सम्झौताहरू खारेज गर्नुपर्ने उनले स्पष्ट पारे। साथै, सीमा सुरक्षाका लागि सेना परिचालन गर्नुपर्ने र छिमेकीसँग रहेका विवाद कूटनीतिक माध्यमबाट समाधान गर्नुपर्नेमा उनले जोड दिए।
शिक्षा प्रणाली सुधारतर्फ उनले ‘किताबी ज्ञान मात्र पर्याप्त छैन’ भन्ने अवधारणा अघि सारे। प्रस्ताव अनुसार विद्यार्थीहरूले हप्तामा तीन दिन सैद्धान्तिक अध्ययन र बाँकी समय श्रम, सीप, सिर्जना र आविष्कारमा केन्द्रित हुनुपर्नेछ। कृषि क्षेत्रलाई व्यवहारमै उतार्दै “एक पालिका, एक उद्योग” र “एक परिवार, एक रोजगार” नीति कार्यान्वयन गर्नुपर्ने उनले बताए।
साम्पाङले काठमाडौँ केन्द्रित विकास मोडेलको आलोचना गर्दै संघीयतालाई व्यवहारमा उतार्नुपर्ने बताए। उनले गाउँ तथा सीमावर्ती क्षेत्रलाई प्राथमिकता दिँदै बजेट विनियोजन गर्नुपर्ने धारणा राखे।
अर्थतन्त्रका सन्दर्भमा उनले वैदेशिक ऋण र अनुदानमा निर्भरता घटाएर आफ्नै स्रोत र जनशक्तिको उपयोगमार्फत आत्मनिर्भर अर्थतन्त्र निर्माण गर्नुपर्नेमा जोड दिए।
सुशासन र भ्रष्टाचार नियन्त्रणका विषयमा उनले कडा नीति प्रस्ताव गर्दै भ्रष्ट कर्मचारीलाई सरुवा होइन, सिधै बर्खास्त गर्ने कानुनी व्यवस्था आवश्यक रहेको बताए। साथै, सहकारी ठगी प्रकरणमा संलग्न जीबी राई लगायतलाई तत्काल पक्राउ गरी कारबाही गर्न र पीडितको रकम ठगहरूको सम्पत्ति लिलाम गरेर फिर्ता गराउन सरकारलाई आग्रह गरे।
