एर्लिङ हालाण्डको उत्कृष्ट प्रदर्शनमा नर्वेले ब्राजिललाई २–१ ले पराजित गर्दै विश्वकप फुटबलको क्वाटरफाइनलमा स्थान सुरक्षित गरेको छ। यससँगै ब्राजिलविरुद्ध अपराजित रहने आफ्नो इतिहासलाई पनि नर्वेले कायम राखेको छ।

लामो समयसम्म प्रतिस्पर्धात्मक बनेको खेलमा हालाण्डले ७९औँ मिनेटमा एन्ड्रियास जेल्डेरुपको उत्कृष्ट क्रसलाई हेडमार्फत गोलमा परिणत गर्दै नर्वेलाई अग्रता दिलाए। त्यसपछि ९०औँ मिनेटमा पुनः जेल्डेरुपकै पासमा व्यक्तिगत दोस्रो गोल गर्दै उनले टोलीको जित सुनिश्चित गरे।

दुई गोलसँगै हालाण्डले प्रतियोगितामा आफ्नो व्यक्तिगत गोल संख्या सात पुर्‍याएका छन् र गोल्डेन बुटको प्रतिस्पर्धामा आफूलाई बलियो दाबेदारका रूपमा उभ्याएका छन्।

ब्राजिलले खेलमा दुई पटक पेनाल्टीको अवसर पाए पनि त्यसको पूरा लाभ लिन सकेन। पहिलो पेनाल्टी ब्रुनो ग्युमोरेसले गुमाए भने इन्जुरी समयमा नेयमारले पेनाल्टीमार्फत एक गोल फर्काए। तर त्यो गोल हार टार्न पर्याप्त भएन।

२८ वर्षपछि विश्वकपमा पुनरागमन गरेको नर्वेले यस जितसँगै ऐतिहासिक रूपमा क्वाटरफाइनल यात्रा तय गरेको छ। अब नर्वेले अन्तिम आठको खेलमा मेक्सिको र इंग्ल्यान्डबीचको विजेतासँग प्रतिस्पर्धा गर्नेछ।