ललितपुर महानगरपालिका–३ ले नागरिकका गुनासा सम्बोधन गर्न तथा वडाबाट उपलब्ध हुने सेवाबारे जानकारी दिन आर्टिफिसियल इन्टेलिजेन्स (एआई) प्रविधिको सुरुवात गरेको छ ।
स्थानीय तहमा सेवा प्रवाह र सञ्चारलाई सहज बनाउने उद्देश्यले नेपालमै पहिलोपटक वडा तहमा यस्तो प्रविधिको प्रयोग गरिएको दाबी गरिएको छ ।
नयाँ प्रविधिमार्फत वडावासीले वडाको भौगोलिक अवस्था, भौतिक संरचना, सांस्कृतिक सम्पदा, जनसङ्ख्या तथा वडा कार्यालयबाट उपलब्ध हुने विभिन्न सेवा र सिफारिसका प्रक्रियाबारे जानकारी लिन सक्नेछन् ।
त्यस्तै, वडा कार्यालय वा जनप्रतिनिधिसँग सम्बन्धित गुनासा पनि एआईमार्फत २४ घण्टा दर्ता गराउन सकिने व्यवस्था गरिएको छ । प्रणालीले जनप्रतिनिधि तथा वडासँग सम्बन्धित विभिन्न जानकारीसमेत उपलब्ध गराउनेछ ।
वडाध्यक्ष गोपाल महर्जनका अनुसार सूचना प्रविधि कम्पनी ब्लु ओभलको प्राविधिक सहकार्यमा एआई प्रणाली विकास गरिएको हो । नागरिकले ०१–५९७००७५ नम्बरमा फोन गरेर आवश्यक जानकारी लिन वा गुनासा दर्ता गराउन सक्नेछन् ।
वडाध्यक्ष महर्जनले वडाबाट प्रदान हुने सेवाका लागि आवश्यक प्रक्रिया र कागजातबारे समेत एआई नम्बरमा फोन गरेर जानकारी लिन सकिने बताए । उनका अनुसार वडाभित्रका सम्पदा, विद्यालय तथा अन्य भौतिक संरचनाबारे पनि एआईले जानकारी दिनेछ ।
यससँगै सामान्य जानकारी र सोधपुछका लागि सेवाग्राहीले वडा कार्यालयमै पुग्नुपर्ने बाध्यता कम हुने र भौतिक रूपमा उपस्थित हुनुपर्ने कामका लागि मात्र कार्यालय आउनुपर्ने वडाको अपेक्षा छ।
