राष्ट्रिय स्वतन्त्र पार्टीका सभापति रवि लामिछाने ले आगामी फागुन २१ गते हुने निर्वाचनपछि आफ्नो नेतृत्वमा पाँच वर्ष स्थायी सरकार सञ्चालन हुने दाबी गरेका छन्।
हेटौंडाको हुप्राचौरमा आयोजित चुनावी सभालाई सम्बोधन गर्दै उनले देशलाई कानुनी राज्यका रूपमा स्थापित गर्न आफ्नो पार्टी प्रतिबद्ध रहेको बताए। २०४६ सालपछि सार्वजनिक भएका सबै प्रमुख काण्डहरूको निष्पक्ष छानबिन गरिने उनको भनाइ थियो।
राष्ट्रिय स्वतन्त्र पार्टी ले प्रतिशोध नभई कानुनी शासन स्थापना गर्ने उद्देश्य राखेको उनले स्पष्ट पारे। “देशमा भएका ठूला भ्रष्टाचार काण्डहरूको फाइल खोल्न हाम्रो सरकार आवश्यक छ,” उनले भने, “निर्णय गर्ने दिन फागुन २१ नै हो, जनताले गर्ने फैसला नै देशको भविष्य निर्धारण गर्नेछ।”
लामिछानेले निर्वाचन सार्न विभिन्न बहाना खोजिएको आरोप लगाउँदै शान्तिपूर्ण मतदान र मतपरिणाम स्वीकार गर्न सबैलाई आग्रह गरे। जेन–जी आन्दोलनका क्रममा तत्कालीन नेपाली कांग्रेस सभापति शेरबहादुर देउवा को निवासमा जलेको भनिएको पैसाको स्रोत खोज्न अनुसन्धान आवश्यक रहेको उनले उल्लेख गरे।
सभामा पार्टीका सहप्रवक्ता रमेश प्रसाईंले निर्वाचनपछि केपी शर्मा ओली को धरौटी जफत हुने दाबी गरे। उनले सुशासनका लागि आफ्नो पार्टी दृढ रूपमा उभिएको बताए।
कार्यक्रममा मकवानपुर क्षेत्र नम्बर–१ का उम्मेदवार प्रकाश गौतम र क्षेत्र नम्बर–२ का उम्मेदवार प्रशान्त उप्रेतीले आफूहरूलाई मत दिए स्थानीय समस्याहरू समाधान गर्न प्राथमिकता दिने प्रतिबद्धता जनाए।
