सरकारले आगामी प्रतिनिधिसभा सदस्य निर्वाचनलाई ध्यानमा राख्दै फागुन २०, २१ र २२ गते देशभर सार्वजनिक बिदा दिने निर्णय गरेको छ। मंगलबार सिंहदरबारमा बसेको मन्त्रिपरिषद् बैठकले निर्वाचन आयोगको सिफारिसअनुसार तीन दिन बिदा दिने औपचारिक घोषणा गरेको हो।
निर्णयअनुसार निर्वाचनअघि, मतदानको दिन तथा त्यसपछिको दिन सरकारी कार्यालय, सार्वजनिक निकाय र शिक्षण संस्थाहरू बन्द रहनेछन्। फागुन २१ गते देशभर एकै चरणमा निर्वाचन सम्पन्न हुने तालिका छ।
निर्वाचन आयोगका अनुसार अधिकांश मतदान केन्द्र विद्यालयमा रहने र कर्मचारीहरू निर्वाचन कार्यमा खटिनुपर्ने भएकाले बिदा आवश्यक ठहरिएको हो। साथै, उपत्यकाबाहिर गएर मतदान गर्नुपर्ने मतदातालाई सहजता मिलोस् भन्ने उद्देश्यले पनि तीन दिन बिदा दिइएको सरकारको भनाइ छ।
सरकारको यो कदमले मतदान प्रक्रिया सुरक्षित, व्यवस्थित र सहभागीमुखी बनाउन सहयोग पुग्ने अपेक्षा गरिएको छ।
