नेपाली कांग्रेसका नेता एवं पूर्वउपप्रधानमन्त्री गोपालमान श्रेष्ठको निधनमा नेपाली कांग्रेसले तीन दिन शोक मनाउने भएको छ ।
ललितपुरको जावलाखेलस्थित हेलिअस अस्पतालमा उपचारका क्रममा मंगलबार ७९ वर्षको उमेरमा श्रेष्ठको निधन भएपछि बुधबार बसेको कांग्रेस केन्द्रीय कार्यसमितिको आकस्मिक बैठकले शोक कार्यक्रम तय गरेको हो ।
कांग्रेसले श्रावण १३, १४ र १५ गते तीन दिनसम्म पार्टीका केन्द्रीय, प्रदेश र जिल्ला कार्यालयमा पार्टीको झण्डा आधा झुकाउने निर्णय गरेको छ । यस्तै, श्रावण १४ गते बिहीबार पार्टीका सबै तहका कार्यालय बन्द गर्ने तथा श्रेष्ठको स्वर्गारोहणको १३ औँ दिनसम्म कार्यालयमा शोक पुस्तिका राख्ने निर्णय गरिएको छ ।
श्रेष्ठको १३ औँ दिनको पुण्यतिथिमा उनको गृह जिल्ला स्याङ्जामा शोकसभा आयोजना गरिने कांग्रेसले जनाएको छ ।
कांग्रेसले श्रेष्ठको निधनलाई पार्टी र राष्ट्रका लागि अपूरणीय क्षति भएको उल्लेख गरेको छ ।
वि.सं. २००४ साल असार ३१ गते स्याङ्जामा जन्मिएका श्रेष्ठ विद्यार्थी जीवनदेखि नै राजनीतिमा सक्रिय थिए । लोकतन्त्र स्थापना र पुनःस्थापनाका विभिन्न आन्दोलनमा सहभागी श्रेष्ठ तत्कालीन नेपाली कांग्रेस प्रजातान्त्रिकका कार्यवाहक सभापति समेत बनेका थिए । उनी ऐतिहासिक १२ बुँदे सहमतिका हस्ताक्षरकर्तामध्ये एक थिए ।
राजनीतिक संघर्षका क्रममा करिब ६ वर्ष जेल जीवन बिताएका श्रेष्ठ २०४८, २०५६ र २०६४ सालमा स्याङ्जाबाट प्रतिनिधि सभा सदस्य तथा २०७० सालमा संविधानसभा सदस्य निर्वाचित भएका थिए ।
श्रेष्ठले उपप्रधानमन्त्रीसहित भौतिक योजना तथा निर्माण, वन तथा वातावरण, वाणिज्य र शिक्षा मन्त्रीको जिम्मेवारी सम्हालेका थिए । उनी नेपाली कांग्रेस संसदीय दलका प्रमुख सचेतकसमेत बनेका थिए ।रासस
