हेटौँडा । नेपालको पहिलो व्यवस्थित यातायात सुरुङमार्गका रूपमा निर्माण गरिएको नागढुङ्गा–सिस्नेखोला सुरुङमार्गको आज औपचारिक उद्घाटन हुँदैछ । पूर्वाधार विकासमन्त्री सुनिल लम्साल, नेपालका लागि जापानी राजदूत मायदा तोरु तथा जापान अन्तर्राष्ट्रिय सहयोग नियोग (जाइका) का अध्यक्षसहितका अधिकारीको उपस्थितिमा सुरुङमार्ग उद्घाटन गर्न लागिएको हो ।
बिहान १०ः२५ बजे हुने उद्घाटन कार्यक्रममा मन्त्री लम्साल, जापानी राजदूत र जाइकाका अध्यक्षले सुरुङभित्र सवारी चलाएर यातायात सञ्चालनको औपचारिक सुरुवात गर्ने कार्यक्रम छ । उद्घाटनपछि निर्माण पक्षले सुरुङमार्ग नेपाल सरकारलाई हस्तान्तरण गर्नेछ ।
सुरुमा एम्बुलेन्स, सुरक्षा निकायका सवारीसाधन तथा अन्य अत्यावश्यक सवारीसाधनलाई सुरुङमार्ग प्रयोग गर्न दिइनेछ । केही दिन पूर्ण परीक्षण सञ्चालन गरेपछि सुरक्षा अवस्था र ट्राफिक व्यवस्थापनको मूल्याङ्कन गर्दै सबै तोकिएका वर्गका सवारीसाधनका लागि सुरुङमार्ग खुला गरिने जनाइएको छ । परीक्षण अवधिमा सुरुङमार्ग प्रयोग गर्ने सवारीसाधनबाट शुल्क नलिइनेछ ।
कुल २ हजार ६८८ मिटर लामो सुरुङमार्गमा नियमित सञ्चालन सुरु भएपछि सवारीसाधनअनुसार शुल्क लाग्नेछ । कार तथा भ्यानले काठमाडौँ प्रवेश गर्दा ६५ रुपैयाँ र बाहिरिँदा ६० रुपैयाँ तिर्नुपर्नेछ । मिनीबस, ट्रक तथा टिपरका लागि काठमाडौँतर्फ ११५ रुपैयाँ र बाहिरिने क्रममा ८० रुपैयाँ शुल्क तोकिएको छ । बस तथा ठूला ट्रकले काठमाडौँ आउँदा २६० रुपैयाँ र बाहिरिँदा २०० रुपैयाँ तिर्नुपर्नेछ ।
पैदलयात्री, मोटरसाइकल तथा अन्य दुईपाङ्ग्रे र तीनपाङ्ग्रे सवारीसाधनलाई सुरुङमार्ग प्रवेशमा रोक लगाइएको छ । पेट्रोल, डिजेल, ग्यासलगायत ज्वलनशील पदार्थ तथा विस्फोटक सामग्री बोकेका सवारीसाधनलाई समेत सुरुङभित्र प्रवेश निषेध गरिएको छ ।
आयोजनामा मुख्य सुरुङसँगै आपत्कालीन उद्धारका लागि छुट्टै उद्धार सुरुङ निर्माण गरिएको छ । सुरुङभित्र दमकल, आकस्मिक उद्धार संयन्त्र, सिसिटिभी, सञ्चार प्रणाली, सुरक्षा उपकरण तथा निरन्तर अक्सिजन प्रवाहको व्यवस्था गरिएको छ ।
काठमाडौँको चन्द्रागिरि नगरपालिका–१ दहचोकको टोटीपाखाबाट सुरु हुने सुरुङमार्ग धादिङको धुनिबेँसी नगरपालिकास्थित सिस्नेखोलामा पुगेर टुंगिन्छ । सुरुङमार्ग सञ्चालनमा आएपछि नागढुङ्गा सडकखण्डको जाम, उकालो र घुमाउरो बाटोका कारण हुने समस्या घट्नुका साथै यात्राको समय र इन्धनसमेत बचत हुने अपेक्षा गरिएको छ ।
आयोजनामा जापान सरकारको करिब २१ अर्ब रुपैयाँ बराबरको सहुलियतपूर्ण ऋण तथा नेपाल सरकारको करिब ६ अर्ब रुपैयाँ लगानी रहेको छ । निर्माणको जिम्मेवारी जापानी कम्पनी हाज्मा एन्डो कर्पोरेसनले लिएको थियो ।
निर्माण कार्य ४२ महिनामा सम्पन्न गर्ने लक्ष्य राखिए पनि कोरोना महामारीलगायतका कारण आयोजना निर्धारित समयभन्दा ढिला सम्पन्न भएको हो ।रासस
